Белаазёрск

Вашыя праблемы ВАМ і вырашаць.

Пачалася вясновая сэсія парламента, і дэпутат Палаты прадстаўнікоў Казімірчык Е.А. мусіць даць адказ, чым займаўся, што зрабіў. Гэтаму і прысвечана інтэрв’ю з ім у газэце “Маяк” ад 28 красавіка 2007 г. Як заўжды – амаль нічога ад сябе, толькі штампы, правераныя шматгадовай практыкай. Калі ж каротка перадаць сутнасць інтэрв’ю, то яно такое – мы робім так, як сказаў А.Р. Лукашэнка. Адказы на асноўныя пытанні пераказваюць Зварот Прэзідэнта. Але ж трошкі ёсць і пра нашыя з вамі патрэбы. Казімірчык Яўген Аляксандравіч дамогся таго,каб рыбакам на Белым возеры дазволілі карыстацца вудамі( цікава, а чым яны лавілі дагэтуль?). Цяпер зразумела, чаму мясцовы Савет дэпутатаў ніяк не ўплывае на жыцце гораду, калі нават такія пытанні мы вымушаны вырашаць на ўзроўні Палаты Прадстаўнікоў. То пэўна па пытанні адмены некаторых падаткаў варта адразу ж звяртацца ў Генеральную Асамблею ААН.